دیسان هاتینه‌وه ... به گیانی ، ها ؟

تراتێنه كاكه ...

بێده‌نگ بووم به‌ڵام خۆ ئه‌و بێده‌نگییه جیاوازه بۆیه‌ش هاتمه‌وه ...

یاخییه‌تی ئه‌وه‌یه ... بزۆزی ... شێتی و ...

به‌ڵام خۆ بۆ ئێمه هیچ فه‌رق ناكا ...

به‌ هه‌ر حال ئه‌وه‌ ئادره‌سی نوێی ئێمه‌ یه ...

ئاوه‌دان شه‌وانی شێتیم و فیلترینگ و جـــــــــــــــــــــــــــگه‌ره ...

 بۆ بینینی وێبلاگی نوێ ئێره كلیك بكه‌ن

پیته ئاوسه‌كانی پێنووسێكی حه‌رام ... سارۆ خه‌لیقی

 بۆ ئه‌و كچه‌ی له پێناو ژیاندا ئامێزێك نازی فرۆشت و مه‌مكێكش تاسه ...

هه‌ر له‌ دۆڕانی یه‌که‌مین نازه‌وه‌
هه‌نێیه‌ک بۆ دوا سەمای خۆزگە‌ و
                                  ماچێک بۆ قڕ نه‌بوون.

هه‌ر له‌ دۆڕانی یه‌که‌مین ئامێزه‌وه‌
                                               سووتییه‌نێک بۆ په‌نجه‌ی ده‌مت و
                                                                        رووتییه‌ک بۆ ئۆقره‌ بوونتان .
هۆ ئامێره‌که‌ی ده‌سته‌مۆی بێده‌نگی و بێ هه‌رای و
                                                                             حه‌یا .

سانا تر ... سانا تر ...
لێوه‌کانت بره‌نگێنه‌ و مه‌مکه‌کانت ره‌نگینتر .
                                                        ئه‌مشەو پیاوێکی ماقووڵتر
له‌م تامه‌‌ بێ نرخه‌دا
                                                         وه‌ره‌س بوونی ده‌ڕمێنێ .

ئه‌مشەو سه‌ره و‌ کۆماری نه‌ریت و شا ئایدۆلۆژیای زاواییزم
                                                     ئەسپێی نێو گەڵتن .
ئه‌تۆش بێده‌نگتر مۆسیقای ئاه بژه‌نه‌
ئەی کچە بێ نازەکەی رۆژهەڵات .

وەی ... وەی ...                      
خوێن ؟! خوێن ؟!
                                  هەموو گیان شەڵاڵی خوێنە .

هه‌ر له‌ دۆڕانی یه‌که‌مین وه‌همی فامین‌ و
مانای قامووسی له‌شت .
                                   دێوه‌زمه‌ی ژنێتی و
سه‌ره‌تای پێناسه‌ کردنی ده‌رپێ و
 کۆتاڵی شۆرته‌ شه‌هیده‌کانت .

ئەرێ ... ئەرێ ...
کۆتاڵی شۆرته‌ شه‌هیده‌کانت
دوایین جلکە چیرۆکی
نوشتوو لە شانی چارەنووس و
ڕووبەندە بێرووەکەی خودا و شەیتان و
                                    زاربەستێکی تر دەهۆننەوە .

ئەتۆش ئەی کچی دیاری هەوەس و دۆڕان
بێده‌نگتر مۆسیقای ئاه بژه‌نه‌
                                  بێدەنگتر لە بزۆزی حیکمەتی شەرم و
                                                                                   بێدەنگتر ... بێدەنگتر ...

 ...* لینکی ئەم هۆنراوەیە لە سەر سایتی ڕێنسانس * ...

لە یاد مە دوو جار منداڵ بووم

یەکەم جار ئەو کاتەی زگی دایکم چۆڵ کرد .

ئێستاش کە لانکەی دڵی تۆ رامدەژێنێ .

           هێڵنج دەژەنێ                                                 
                 لێفە حەشارگەکانی پێخەفێکی شەهید .

           بێز دەژەنێ                                                       
                 دەرپێ شاراوەکانی یەغدانێکی روو سوور .

گە‌ڕۆڵە ... گەڕۆڵ 

                بەردەپێی حەزێکی بزۆز و               

                                               قەڵغانە رانی گمە ، گمە .... گن .

بۆ مانا کردنەوەی مانا

  چ بێ حەیان تاوانچیانی شوناسە گۆڕ . دۆڕانی پێناسەی مرۆڤە و پیتەکانیش نوستوون ، خەوێکی یەکجارییە و
 بێدەنگ ... بێدەنگ ... ژیان دەپشکنن خەیاڵە بزۆزەکانی مناڵەکەی خاوەر، قاڕنێش بزەی لە سەر دەدات . چ سامێکی تاپۆیە خەو !

 * ... / پێوانه/ ... *

پڕ به مستی هه‌نگاوه‌كانی شه‌قام

سه‌مای بڵقی شه‌رمێونی قوڵكه

چ ئایه‌تێكی بێحه‌یای خۆشه‌ویسته‌كه‌م .

.............................................................................................

* ... / ئاوس/ ... *

له هه‌رێمی سه‌ره‌خۆشی خه‌ته‌نه‌دا

چ پیرۆز ئاوس ده‌بن

كچانی نێو گه‌ڵ حه‌رام و

                        كوڕانی خه‌ساو .

 شه‌هیدکردنی کیژێکی کوردی ئێزیدی به‌ دڕنده‌ترین شێوه‌،

ته‌نها له‌به‌ر ئه‌وه‌ی کوڕێکی خۆش ویستووه.

 ... ... . 
دایکم هه‌رگیز باوه‌شی به‌ باوکم نه‌فرۆشت .
یه‌که‌م جار خاڵه‌ گه‌وره‌که‌م و مامم و باپیرم دوای چه‌ند رۆژ لێدان و کوتان به‌ زۆری دایکمیان له‌ ئامێزی باوکم نا .
دایم هه‌ر ده‌یقیژاند و هاواری ده‌کرد ... وام لێمه‌که‌ن ... لێم گه‌رێن ... ئه‌و پیاوه‌م ناوێ و ... .
به‌ڵام پیاو ماقوڵه‌کان رووبه‌ندی نه‌ریت زاریان به‌ست .
دایکم ماندوو بوو و هه‌ر به‌ ده‌م گریانه‌وه‌ سه‌یری جۆگه‌له‌ی خوێنی نێوگه‌ڵی ده‌کرد .باوکیشم به‌ بزه‌ بزه‌وه‌ دۆخینه‌که‌ی توند کرده‌وه‌ و خزمه‌کانیش له‌ ده‌ره‌وه‌ی وه‌تاغه‌که‌ چه‌پڵه‌یان بۆ زاوایه‌تی باوکم لێده‌دا .
ئیتر له‌وه‌ به‌دوا دایکم هه‌موو شه‌وێ خۆی شل ده‌کرد و به‌ بێده‌نگی ده‌چووه‌ ژێر لێفه‌که‌ی باوکمه‌وه‌ .
نازانم بۆچی به‌ڵام دایکم قه‌ت هاواری نه‌کرده‌وه‌ .

                          ***
له‌ نێو زگی دایکمدابه‌ ویره‌ ویر ئه‌و گۆرانیه‌ی نه‌نکم ده‌کووته‌وه‌ " من تاوانی ژوانێکی ره‌شم " و هه‌ر بیرم له‌وه‌ ده‌کرده‌وه‌ ،  بڵێی چاوره‌نووسی دایکم بۆ منیش دووپات بێته‌وه‌ .
دیسان له‌ ناو کۆری هه‌ڵپه‌رین و شادیدا ئه‌وه‌ ته‌نیا من بووم ده‌گریام .زۆرم پێخۆش بوو هاتوومه‌ته‌ دنیا به‌ڵام نه‌مده‌زانی بۆ چی ده‌گریم .
گوێم لێ بوو به‌ باوکمیان کوت منداڵه‌که‌ کچه‌ .ئیتر تا ئێستاش ده‌نگی شادی و خۆشم نه‌بیسته‌وه‌ .
بێئه‌وه‌ی بزانم بۆ چی و له‌به‌رچی ؟ هه‌ر ده‌گریام تا ئه‌و کاته‌ی به‌رده‌ به‌هێزه‌کانی ده‌ستی باوکم و براکه‌م له‌ قژی په‌رێشان و له‌ سه‌ری بێباکم بوونه‌ میوان . میوانێک که‌ هه‌رگیز فه‌رموو فه‌رمووم بۆ نه‌کرد .
هه‌ستم به‌ بووکێنی ده‌کرد چونکه‌ هه‌ر وه‌کوو دایکم جۆگه‌له‌یه‌کی خوێن له‌ منیشه‌وه‌ سه‌رچاوه‌ی گرت .هه‌ڵبه‌ت له‌ سه‌ری یاخیمه‌وه‌ نه‌ک له‌ نێو گه‌ڵی حه‌راممه‌وه‌ .
هه‌رئه‌وه‌ش بوو جیاوازی من و دایکم و نه‌نه‌پیره‌م ... .

 ئادره‌سی ئه‌و ماڵپه‌رانه‌ی ئه‌م وتاره‌یان داناوه‌ :

ماڵپه‌ری دوکتوور رۆئیا تلووعی   ماڵپه‌ری کوردستان نێت 

وێبلاگی کاوه‌ کرماشانی             وێبلاگی دۆعـــا

... تا بناری کوڵمه‌که‌ت جێ لێوم لێژه‌ قوربان                
                         نووکه‌ نووکی هه‌نگاوی خوێناو سارێژه‌ قوربان

 
  سه‌یته‌ره‌ی دڵه‌و ماچ باری لێوم قه‌ڵغان ده‌کا                
                        ئه‌و که‌ی ده‌سته‌ملانی پیاڵه‌ی وریا و گێژه‌ قوربان  

دوا هه‌نگاوی ڕێ بڕینه‌ . ئێلهامه‌که‌م ده‌دوێ         
                         ئه‌شێ من بێده‌نگتر بشنه‌فم . تۆ بێژه‌ قوربان

 نازانین پرسه‌ بگێرین یان پیرۆزبای بکه‌ین  .
خه‌مه‌کان و خۆشیه‌کان له‌م وڵاته‌‌دا  خۆیان ده‌گه‌ڵ یه‌ک ده‌بینه‌وه‌ ، تێکه‌ڵ به‌یه‌کن و بێ یه‌کتر هیچیان پێناسه‌یان نیه‌ .
ژینۆسایدی هه‌ڵه‌بچه‌ و جێژنی نه‌ته‌وایه‌تی نه‌ورۆز و له‌ سێداره‌درانی شه‌هید پێشه‌وا و هاوڕێکانی خۆیان با بدوێن چونکه‌ هه‌موومان عاجزین له‌ درکاندنیاندا .
              
               ****************
 
به‌ وته‌ی مامۆستا هێمن :
به‌هاری کورده‌واری سوور و شینه‌ .

وشه‌کان له‌ په‌یوه‌ندییه‌ حه‌رامه‌کانی پیته یاخیه‌کان رسته‌گه‌لێکی بیژوو ده‌خوڵقێنن  بۆ درکاندنی شه‌وه‌ ژانێکی خه‌یاڵی دیل کراوی ئه‌وینێکی شێت مانا.
گریان ،ره‌شبه‌ڵه‌کی کۆرپه‌ بێ تاوانه‌که‌ی چاوه‌ زیزه‌کانی ره‌ش هه‌وری گوروویه‌کی بێ کۆتاییه‌ له‌ ئامێزی چاوه‌روانیه‌کی تۆراو دا .
بزه‌ش وێنه‌ی درۆ بێ‌وێنه‌ی فه‌لسه‌فه‌یه‌ .ئێمه‌ش سوڕماوی راسته‌قینه‌یه‌کی بێ ره‌نگ و بۆ . ئێمه‌ کۆگا خوێی زامه‌ بێ سنووره‌کانی ئه‌وینن له‌ رووباری یه‌که‌مین شه‌وی زاوایه‌تی و نوێترین نیگای بووکێنیمان . ئێمه‌ ئه‌کته‌رێکی ده‌سته‌مۆی خوڵقێنه‌رێکی هه‌رده‌م سه‌رخۆشین .ساقیش جانتای شه‌وه‌ رووره‌شه‌که‌ی ماتی و په‌رۆشی رۆژه‌ روو زه‌رده‌که‌ی ئاویلکه‌ی دوا ساته‌کانی کاتێکی قه‌ت نه‌ خوڵقاوه‌ .

چه‌پڵه‌ی لیوانی سه‌رخۆشانیش لێوی روومه‌تی ده‌ستی ئه‌غیاره‌کان زله‌‌ ئه‌کات .
ئاوس بووین له‌ نیگای دزراوی تاوان و شه‌کاوه‌یی ئاڵای نه‌دیتن و سه‌مای داره‌ زۆڵه‌کانی هه‌وه‌سی خاک .له‌ قامووسی قاحبه‌خانه‌کانی مێتافیزیکدا.
ژیان کۆچی ناواده‌ی هه‌میشه‌ تینوو چی له‌ گیانی مه‌رگ ده‌وێ ؟ ئه‌ی هه‌وره‌ بێ ئاسمانه‌کانی ئه‌وینه‌که‌م .

  هاورێی دڵه‌ نه‌زۆکه‌که‌ی مێژووی پێنووسه‌که‌م ، ئازاره‌ ... ئازار .

 فرمێسکیش کۆرپه‌ی ئێشه‌ ئاخر له‌ بیرم چوو پێتان بڵێم ئازار نه‌زۆک نیه‌ .چونکه‌ ساڵانێکی درێژه‌ شه‌وه‌ تێکه‌ڵ بوونی له‌ته‌ سه‌هۆڵه‌کان له‌ ڕشانه‌وه‌ی هه‌وتاوه‌ به‌دمه‌سته‌که‌ی ئاواتدا ژان ده‌زێنێ.
هه‌ڵبه‌ت ماسیه‌ سووره‌ نازداره‌که‌ی سه‌ر تاقچه‌که‌یان نامه‌یه‌ی بۆ پشیله‌ بزۆزه‌کانی خاوه‌نه‌که‌ی ده‌زوێنده‌وه‌.

خه‌ونم دی خه‌و له‌ رۆژدا خه‌ون ده‌بینێ. پێکه‌نیم ، تاوانی دابرانی لێوه‌کانم نه‌زۆک بوونی پێنووسه‌که‌م بوو.

له‌ په‌له‌قاژه‌ی خونچه‌ بزۆزه‌کانی مانه‌وه‌ داو
پیاسه‌ی پاشای مه‌رگ
له‌ ژێر نازی مانگێکی یاخی
 کۆڵانی ته‌وێڵی گه‌ڵایه‌کی زیزی ئه‌پێوا
                                            فرمێسک ... .

به‌فرانباری ۲۷۰۶

 شه‌کاوه‌یه‌ ئاڵای سانسۆر

...*بۆ روحه‌ دایکاوییه‌که‌ی شه‌هید پێشه‌وا قازی محه‌ممه‌دی نه‌مر *...

**************************************

تۆ شۆڕه‌بی کام دارستانی ؟
وا لانکی دڵه‌ ساوای خاک راده‌ژێنی .
                                          تۆ ئه‌ی راژێنه‌ر...
تۆ شوێنه‌ په‌ینجه‌ی کام به‌رۆک بڕاوی ؟
وا په‌نجه‌ پنجه‌
به‌هاره‌ زستان ده‌بووژێنی
                                         تۆ ئه‌ی بووژێنه‌ر ...

تۆ سۆزه‌ تۆفانی کام گه‌رووی ؟
وا کۆشکه‌ زاوای بیژوو ده‌رووخێنی .
                                       تۆ ئه‌ی رووخێنه‌ر ...

تۆ گریانه‌ چاوی کام هه‌تیوی ؟
وا رووباره‌ ئه‌ستێره‌ ده‌بارێنی .
                                       تۆ ئه‌ی بارێنه‌ر ...

تۆ شه‌و پۆشی کام ره‌ش خێڵێ
وا تۆوی شه‌وتاوی مانگ ده‌چێنی .
                                         تۆ ئه‌ی چێنه‌ر...

تۆ ژینه‌ پیری وڵاتی کام خودای ؟
وا قاف ... قاف ...
ژاره‌ قاپی قاڵاو ده‌مه‌شکێنی.
                                         تۆ ئه‌ی لاوێنه‌ر... .

                                                  تۆ باڵا گرتووی چۆمه‌ خنکاوی هه‌وره‌ ونی .
                               بڵێسه‌ی دارستانی سێدراه‌ ،
                                 کۆرپه‌ی بێ کورسی هه‌ڵفڕینت
                                             شوێنه‌ په‌نجه‌ی به‌رۆکی وڵاته‌ لاڵه‌که‌ی 
       زیزه‌ وه‌رزی .
                              سۆزه‌ یاخی سڕ هه‌ناسه‌ی 
                       هه‌تیوه‌ ئاڵای بێ باڵای .
                                     به‌فراوی به‌فرانباری دیله‌ به‌فری .
            هۆ ‌ پیره‌ پیره‌که‌م
                          له‌ ئاسمانی ڕێبه‌ندانه‌که‌ت
        کلوو... کلوو...
                           به‌هارده‌تکێته‌ ئامێزی دێزی
                                                               زستان و

                                                                                        زستان و

                                                                                                      زستان .

 
2 ڕێبه‌ندانی ۲۷۰۴

پاییزه‌ پیاسه‌و به‌هاره‌ ماچ

********

له‌ پاییزه‌ هه‌نگاوی لێوه‌کانتا
خشپه‌ی به‌هاره‌ ماچ و
نووکه‌  نووکی
بووکه‌ بارانه‌ی نیگاتم دۆزییه‌وه‌ .

 تۆ سوور  سوور زه‌ردی
له‌ زه‌ردیدا
خشپه‌ی گه‌ڵای نیوه‌ گیان
گوڵدانی پیره‌ مێردی خاک
ئاوس ئه‌کات.
نا نا مه‌ترسێ
تێر ببارێنه‌ تیری بزه‌ت
روومه‌تم قه‌ڵغانی تیشکی ماچه‌کانته‌وه‌
مژۆڵیش
رێژه‌ی وه‌ره‌زه‌ بارینیت.
 

************************

گۆرستان

قامووسه‌ زارم دیلی‌ نیگاته‌
سابۆیه‌
هاوارێک بێده‌نگیم
خسته‌  ره‌شه‌ زاری پێنووس و
ئه‌ویش
خه‌یاڵ...خه‌یاڵ...
ئه‌وینی بارانده‌
سپی روومه‌تی لێنووس.

ساڵه‌هایه‌ گیفانم ئامێزی ئه‌م رازه‌یه‌.

پووشپه‌ری ۲۷۰۴